‘‘อาหญฺญนฺตุ สพฺพวีณา, เภริโย ทินฺทิมานิ จ;
ขรมุขานิ ธเมนฺตุ [วทนฺตุ (สี. ปี.)], นทนฺตุ เอกโปกฺขราฯ
[2360]
‘‘มุทิงฺคา ปณวา สงฺขา, โคธา ปริวเทนฺติกา;
ทินฺทิมานิ จ หญฺญนฺตุ, กุตุมฺป [กุฏุมฺพา (สี. สฺยา. ปี.)] ทินฺทิมานิ จ’’ฯ
[2361]
‘‘สา เสนา มหตี อาสิ, อุยฺยุตฺตา สิวิวาหินี;
ชาลินา มคฺคนาเยน, วงฺกํ ปายาสิ ปพฺพตํฯ
[2362]
‘‘โกญฺจํ นทติ มาตงฺโค, กุญฺชโร สฏฺฐิหายโน;
กจฺฉาย พทฺธมานาย, โกญฺจํ นทติ วารโณฯ
[2363]
‘‘อาชานียา หสิยนฺติ [หสิสฺสิํสุ (สี. ปี.)], เนมิโฆโส อชายถ;
อพฺภํ รโช อจฺฉาเทสิ, อุยฺยุตฺตา สิวิวาหินีฯ
[2364]
‘‘สา เสนา มหตี อาสิ, อุยฺยุตฺตา หารหารินี;
ชาลินา มคฺคนาเยน, วงฺกํ ปายาสิ ปพฺพตํฯ
[2365]
‘‘เต ปาวิํสุ พฺรหารญฺญํ, พหุสาขํ มโหทกํ [พหุทิชํ (ปี.)];
ปุปฺผรุกฺเขหิ สญฺฉนฺนํ, ผลรุกฺเขหิ จูภยํฯ
[2366]
‘‘ตตฺถ พินฺทุสฺสรา วคฺคู, นานาวณฺณา พหู ทิชา;
กูชนฺตมุปกูชนฺติ, อุตุสมฺปุปฺผิเต ทุเมฯ
[2367]
‘‘เต คนฺตฺวา ทีฆมทฺธานํ, อโหรตฺตานมจฺจเย;
ปเทสํ ตํ อุปาคจฺฉุํ, ยตฺถ เวสฺสนฺตโร อหุ’’ฯ
มหาราชปพฺพํ นามฯ
ฉขตฺติยกมฺมํ
[2368]
‘‘เตสํ สุตฺวาน นิคฺโฆสํ, ภีโต เวสฺสนฺตโร อหุ;
ปพฺพตํ อภิรุหิตฺวา, ภีโต เสนํ อุทิกฺขติฯ
[2369]
‘‘อิงฺฆ มทฺทิ นิสาเมหิ, นิคฺโฆโส ยาทิโส วเน;
อาชานียา หสิยนฺติ, ธชคฺคานิ จ ทิสฺสเรฯ
[2370]
‘‘อิเม นูน อรญฺญสฺมิํ, มิคสงฺฆานิ ลุทฺทกา;
วาคุราหิ ปริกฺขิปฺป, โสพฺภํ ปาเตตฺวา ตาวเท;
วิกฺโกสมานา ติพฺพาหิ, หนฺติ เนสํ วรํ วรํฯ
[2371]
‘‘ยถา มยํ อทูสกา, อรญฺเญ อวรุทฺธกา;
อมิตฺตหตฺถตฺตํ คตา, ปสฺส ทุพฺพลฆาตกํ’’ฯ
[2372]
‘‘อมิตฺตา นปฺปสาเหยฺยุํ, อคฺคีว อุทกณฺณเว;
ตเทว ตฺวํ วิจินฺเตหิ, อปิ โสตฺถิ อิโต สิยา’’ฯ
[2373]
‘‘ตโต เวสฺสนฺตโร ราชา, โอโรหิตฺวาน ปพฺพตา;
นิสีทิ ปณฺณสาลายํ, ทฬฺหํ กตฺวาน มานสํ’’ฯ
[2374]
‘‘นิวตฺตยิตฺวาน รถํ, วุฏฺฐเปตฺวาน เสนิโย;
เอกํ อรญฺเญ วิหรนฺตํ, ปิตา ปุตฺตํ อุปาคมิฯ
[2375]
‘‘หตฺถิกฺขนฺธโต โอรุยฺห, เอกํโส ปญฺชลีกโต;
ปริกิณฺโณ [ปริกฺขิตฺโต (สี. ปี.)] อมจฺเจหิ, ปุตฺตํ สิญฺจิตุมาคมิฯ
[2376]
‘‘ตตฺถทฺทส กุมารํ โส, รมฺมรูปํ สมาหิตํ;
นิสินฺนํ ปณฺณสาลายํ, ฌายนฺตํ อกุโตภยํฯ
[2377]
‘‘ตญฺจ ทิสฺวาน อายนฺตํ, ปิตรํ ปุตฺตคิทฺธินํ;
เวสฺสนฺตโร จ มทฺที จ, ปจฺจุคฺคนฺตฺวา อวนฺทิสุํฯ
[2378]
‘‘มทฺที จ สิรสา ปาเท, สสุรสฺสาภิวาทยิ;
‘มทฺที อหญฺหิ เต เทว, ปาเท วนฺทามิ เต สุณฺหา’ [หุสา (สี. สฺยา. ปี.)];
เตสุ ตตฺถ ปลิสชฺช, ปาณินา ปริมชฺชถ’’ฯ
[2379]
‘‘กจฺจิ โว กุสลํ ปุตฺต, กจฺจิ ปุตฺต อนามยํ;
กจฺจิ อุญฺเฉน ยาเปถ, กจฺจิ มูลผลา พหูฯ
[2380]
‘‘กจฺจิ ฑํสา มกสา จ, อปฺปเมว สรีสปา;
วเน วาฬมิคากิณฺเณ, กจฺจิ หิํสา น วิชฺชติ’’ฯ
[2381]
‘‘อตฺถิ โน ชีวิกา เทว, สา จ ยาทิสกีทิสา;
กสิรา ชีวิกา โหม [อโหสิ (?)], อุญฺฉาจริยาย ชีวิตํฯ
[2382]
‘‘อนิทฺธินํ มหาราช, ทเมตสฺสํว สารถิ;
ตฺยมฺหา อนิทฺธิกา ทนฺตา, อสมิทฺธิ ทเมติ โนฯ
[2383]
‘‘อปิ โน กิสานิ มํสานิ, ปิตุ มาตุ อทสฺสนา;
อวรุทฺธานํ มหาราช, อรญฺเญ ชีวโสกินํ’’ฯ
[2384]
‘‘เยปิ เต สิวิเสฏฺฐสฺส, ทายาทาปตฺตมานสา;
ชาลี กณฺหาชินา จุโภ, พฺราหฺมณสฺส วสานุคา;
อจฺจายิกสฺส ลุทฺทสฺส, โย เน คาโวว สุมฺภติฯ
[2385]
‘‘เต ราชปุตฺติยา ปุตฺเต, ยทิ ชานาถ สํสถ;
ปริยาปุณาถ โน ขิปฺปํ, สปฺปทฏฺฐํว มาณวํ’’ฯ
[2386]
‘‘อุโภ กุมารา นิกฺกีตา, ชาลี กณฺหาชินา จุโภ;
พฺราหฺมณสฺส ธนํ ทตฺวา, ปุตฺต มา ภายิ อสฺสส’’ฯ
[2387]
‘‘กจฺจิ นุ ตาต กุสลํ, กจฺจิ ตาต อนามยํ;
กจฺจิ นุ ตาต เม มาตุ, จกฺขุ น ปริหายติ’’ฯ
[2388]
‘‘กุสลญฺเจว เม ปุตฺต, อโถ ปุตฺต อนามยํ;
อโถ จ ปุตฺต เต มาตุ, จกฺขุ น ปริหายติ’’ฯ
[2389]
‘‘กจฺจิ อโรคํ โยคฺคํ เต, กจฺจิ วหติ วาหนํ;
กจฺจิ ผีโต ชนปโท, กจฺจิ วุฏฺฐิ น ฉิชฺชติ’’ฯ
[2390]
‘‘อโถ อโรคํ โยคฺคํ เม, อโถ วหติ วาหนํ;
อโถ ผีโต ชนปโท, อโถ วุฏฺฐิ น ฉิชฺชติ’’ฯ
[2391]
‘‘อิจฺเจวํ มนฺตยนฺตานํ, มาตา เนสํ อทิสฺสถ;
ราชปุตฺตี คิริทฺวาเร, ปตฺติกา อนุปาหนาฯ
[2392]
‘‘ตญฺจ ทิสฺวาน อายนฺตํ, มาตรํ ปุตฺตคิทฺธินิํ;
เวสฺสนฺตโร จ มทฺที จ, ปจฺจุคฺคนฺตฺวา อวนฺทิสุํฯ
[2393]
‘‘มทฺที จ สิรสา ปาเท, สสฺสุยา อภิวาทยิ;
มทฺที อหญฺหิ เต อยฺเย, ปาเท วนฺทามิ เต สุณฺหา’’ฯ
[2394]
‘‘มทฺทิญฺจ ปุตฺตกา ทิสฺวา, ทูรโต โสตฺถิมาคตา;
กนฺทนฺตา มภิธาวิํสุ, วจฺฉพาลาว มาตรํฯ
[2395]
‘‘มทฺที จ ปุตฺตเก ทิสฺวา, ทูรโต โสตฺถิมาคเต;
วารุณีว ปเวเธนฺตี, ถนธาราภิสิญฺจถ’’ฯ
[2396]
‘‘สมาคตานํ ญาตีนํ, มหาโฆโส อชายถ;
ปพฺพตา สมนาทิํสุ, มหี ปกมฺปิตา อหุฯ
[2397]
‘‘วุฏฺฐิธารํ ปวตฺเตนฺโต, เทโว ปาวสฺสิ ตาวเท;
อถ เวสฺสนฺตโร ราชา, ญาตีหิ สมคจฺฉถฯ
[2398]
‘‘นตฺตาโร สุณิสา ปุตฺโต, ราชา เทวี จ เอกโต;
ยทา สมาคตา อาสุํ, ตทาสิ โลมหํสนํฯ
[2399]
‘‘ปญฺชลิกา ตสฺส ยาจนฺติ, โรทนฺตา เภรเว วเน;
เวสฺสนฺตรญฺจ มทฺทิญฺจ, สพฺเพ รฏฺฐา สมาคตา;
ตฺวํ โนสิ อิสฺสโร ราชา, รชฺชํ กาเรถ โน อุโภ’’ฯ
ฉขตฺติยกมฺมํ นามฯ
[2400]
‘‘ธมฺเมน รชฺชํ กาเรนฺตํ, รฏฺฐา ปพฺพาชยิตฺถ มํ;
ตฺวญฺจ ชานปทา เจว, เนคมา จ สมาคตา’’ฯ
[2401]
‘‘ทุกฺกฏญฺจ หิ โน ปุตฺต, ภูนหจฺจํ กตํ มยา;
โยหํ สิวีนํ วจนา, ปพฺพาเชสิมทูสกํ’’ฯ
[2402]
‘‘เยน เกนจิ วณฺเณน, ปิตุ ทุกฺขํ อุทพฺพเห;
มาตุ ภคินิยา จาปิ, อปิ ปาเณหิ อตฺตโน’’ฯ
[2403]
‘‘ตโต เวสฺสนฺตโร ราชา, รโชชลฺลํ ปวาหยิ;
รโชชลฺลํ ปวาเหตฺวา, สงฺขวณฺณํ [สจฺจวณฺณํ (สี. สฺยา.)] อธารยิ’’ฯ
[2404]
‘‘สีสํ นฺหาโต สุจิวตฺโถ, สพฺพาภรณภูสิโต;
ปจฺจยํ นาคมารุยฺห, ขคฺคํ พนฺธิ ปรนฺตปํฯ
[2405]
‘‘ตโต สฏฺฐิสหสฺสานิ, โยธิโน จารุทสฺสนา;
สหชาตา ปกิริํสุ, นนฺทยนฺตา รเถสภํฯ
[2406]
‘‘ตโต มทฺทิมฺปิ นฺหาเปสุํ, สิวิกญฺญา สมาคตา;
เวสฺสนฺตโร ตํ ปาเลตุ, ชาลี กณฺหาชินา จุโภ;
อโถปิ ตํ มหาราชา, สญฺชโย อภิรกฺขตุ’’ฯ
[2407]
‘‘อิทญฺจ ปจฺจยํ ลทฺธา, ปุพฺเพ สํกฺเลสมตฺตโน;
อานนฺทิยํ อาจริํสุ, รมณีเย คิริพฺพเชฯ
[2408]
‘‘อิทญฺจ ปจฺจยํ ลทฺธา, ปุพฺเพ สํกฺเลสมตฺตโน;
อานนฺทิ วิตฺตา สุมนา, ปุตฺเต สงฺคมฺม ลกฺขณาฯ
[2409]
‘‘อิทญฺจ ปจฺจยํ ลทฺธา, ปุพฺเพ สํกฺเลสมตฺตโน;
อานนฺทิ วิตฺตา ปตีตา, สห ปุตฺเตหิ ลกฺขณา’’ฯ
[2410]
‘‘เอกภตฺตา ปุเร อาสิํ, นิจฺจํ ถณฺฑิลสายินี;
อิติ เมตํ วตํ อาสิ, ตุมฺหํ กามา หิ ปุตฺตกาฯ
[2411]
‘‘ตํ เม วตํ สมิทฺธชฺช, ตุมฺเห สงฺคมฺม ปุตฺตกา;
มาตุชมฺปิ ตํ ปาเลตุ, ปิตุชมฺปิ จ ปุตฺตก;
อโถปิ ตํ มหาราชา, สญฺชโย อภิรกฺขตุฯ
[2412]
‘‘ยํ กิญฺจิตฺถิ กตํ ปุญฺญํ, มยฺหญฺเจว ปิตุจฺจ เต;
สพฺเพน เตน กุสเลน, อชโร อมโร ภว’’ฯ
[2413]
‘‘กปฺปาสิกญฺจ โกเสยฺยํ, โขมโกฏุมฺพรานิ จ;
สสฺสุ สุณฺหาย ปาเหสิ, เยหิ มทฺที อโสภถฯ
[2414]
‘‘ตโต เหมญฺจ กายูรํ, คีเวยฺยํ รตนามยํ;
สสฺสุ สุณฺหาย ปาเหสิ, เยหิ มทฺที อโสภถฯ
[2415]
‘‘ตโต เหมญฺจ กายูรํ, องฺคทํ มณิเมขลํ;
สสฺสุ สุณฺหาย ปาเหสิ, เยหิ มทฺที อโสภถฯ
[2416]
‘‘อุณฺณตํ มุขผุลฺลญฺจ, นานารตฺเต จ มาณิเก [มาณิเย (สี. ปี.)];
สสฺสุ สุณฺหาย ปาเหสิ, เยหิ มทฺที อโสภถฯ
[2417]
‘‘อุคฺคตฺถนํ คิงฺคมกํ, เมขลํ ปาฏิปาทกํ [ปฏิปาทุกํ (สี. สฺยา.), ปาลิปาทกํ (ปี.)];
สสฺสุ สุณฺหาย ปาเหสิ, เยหิ มทฺที อโสภถฯ
[2418]
‘‘สุตฺตญฺจ สุตฺตวชฺชญฺจ, อุปนิชฺฌาย เสยฺยสิ;
อโสภถ ราชปุตฺตี, เทวกญฺญาว นนฺทเนฯ
[2419]
‘‘สีสํ นฺหาตา สุจิวตฺถา, สพฺพาลงฺการภูสิตา;
อโสภถ ราชปุตฺตี, ตาวติํเสว อจฺฉราฯ
[2420]
‘‘กทลีว วาตจฺฉุปิตา, ชาตา จิตฺตลตาวเน;
ทนฺตาวรณสมฺปนฺนา, ราชปุตฺตี อโสภถฯ
[2421]
‘‘สกุณี มานุสินีว, ชาตา จิตฺตปตฺตา ปตี;
นิคฺโรธปกฺกพิมฺโพฏฺฐี, ราชปุตฺตี อโสภถฯ
[2422]
‘‘ตสฺสา จ นาคมาเนสุํ, นาติพทฺธํว กุญฺชรํ;
สตฺติกฺขมํ สรกฺขมํ, อีสาทนฺตํ อุรูฬฺหวํฯ
[2423]
‘‘สา มทฺที นาคมารุหิ, นาติพทฺธํว กุญฺชรํ;
สตฺติกฺขมํ สรกฺขมํ, อีสาทนฺตํ อุรูฬฺหวํ’’ฯ
[2424]
‘‘สพฺพมฺหิ ตํอรญฺญมฺหิ, ยาวนฺเตตฺถ มิคา อหุํ;
เวสฺสนฺตรสฺส เตเชน, นญฺญมญฺญํ วิเหฐยุํฯ
[2425]
‘‘สพฺพมฺหิ ตํอรญฺญมฺหิ, ยาวนฺเตตฺถ ทิชา อหุํ;
เวสฺสนฺตรสฺส เตเชน, นญฺญมญฺญํ วิเหฐยุํฯ
[2426]
‘‘สพฺพมฺหิ ตํอรญฺญมฺหิ, ยาวนฺเตตฺถ มิคา อหุํ;
เอกชฺฌํ สนฺนิปาติํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2427]
‘‘สพฺพมฺหิ ตํอรญฺญมฺหิ, ยาวนฺเตตฺถ ทิชา อหุํ;
เอกชฺฌํ สนฺนิปาติํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2428]
‘‘สพฺพมฺหิ ตํอรญฺญมฺหิ, ยาวนฺเตตฺถ มิคา อหุํ;
นาสฺสุ มญฺชู นิกูชิํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2429]
‘‘สพฺพมฺหิ ตํอรญฺญมฺหิ, ยาวนฺเตตฺถ ทิชา อหุํ;
นาสฺสุ มญฺชู นิกูชิํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2430]
‘‘ปฏิยตฺโต ราชมคฺโค, วิจิตฺโต ปุปฺผสนฺถโต;
วสิ เวสฺสนฺตโร ยตฺถ, ยาวตาว เชตุตฺตราฯ
[2431]
‘‘ตโต สฏฺฐิสหสฺสานิ, โยธิโน จารุทสฺสนา;
สมนฺตา ปริกิริํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2432]
‘‘โอโรธา จ กุมารา จ, เวสิยานา จ พฺราหฺมณา;
สมนฺตา ปริกิริํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2433]
‘‘หตฺถาโรหา อนีกฏฺฐา, รถิกา ปตฺติการกา;
สมนฺตา ปริกิริํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2434]
‘‘สมาคตา ชานปทา, เนคมา จ สมาคตา;
สมนฺตา ปริกิริํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2435]
‘‘กโรฏิยา จมฺมธรา, อิลฺลีหตฺถา [อินฺทิหตฺถา (สฺยา. ก.), ขคฺคหตฺถา (สี. ปี.)] สุวมฺมิโน;
ปุรโต ปฏิปชฺชิํสุ, เวสฺสนฺตเร ปยาตมฺหิ;
สิวีนํ รฏฺฐวฑฺฒเนฯ
[2436]
‘‘เต ปาวิสุํ ปุรํ รมฺมํ, มหาปาการโตรณํ;
อุเปตํ อนฺนปาเนหิ, นจฺจคีเตหิ จูภยํฯ
[2437]
‘‘วิตฺตา ชานปทา อาสุํ, เนคมา จ สมาคตา;
อนุปฺปตฺเต กุมารมฺหิ, สิวีนํ รฏฺฐวฑฺฒเนฯ
[2438]
‘‘เจลุกฺเขโป อวตฺติตฺถ, อาคเต ธนทายเก;
นนฺทิํ ปเวสิ [นนฺทิ-ปฺปเวสิ (สี. สฺยา. ปี.)] นคเร, พนฺธนา โมกฺโข อโฆสถฯ
[2439]
‘‘ชาตรูปมยํ วสฺสํ, เทโว ปาวสฺสิ ตาวเท;
เวสฺสนฺตเร ปวิฏฺฐมฺหิ, สิวีนํ รฏฺฐวฑฺฒเนฯ
[2440]
‘‘ตโต เวสฺสนฺตโร ราชา, ทานํ ทตฺวาน ขตฺติโย;
กายสฺส เภทา สปฺปญฺโญ, สคฺคํ โส อุปปชฺชถา’’ติฯ
เวสฺสนฺตรชาตกํ ทสมํฯ
มหานิปาต นิฏฺฐิตาฯ
ชาตกปาฬิ นิฏฺฐิตาฯ